Plantun de Prouvènço

Pèr coumpara dos planto d'encò nostre

Cuscuta approximata & Lilium martagon

Péu-de-lin(-di-sepalo-lusènto)

Cuscuta approximata

Convolvulaceae

Àutri noum : Péu-de-lin, Péu-de-damo, Rasco, Barbo-de-mouine, Cuscuto.

Nom en français : Cuscute approximative.

Descripcioun :
Lou péu-de-lin-di-sepalo-lusènto, pulèu rare, douno d'èr à Cuscuta epithymum, pamens la planto èi pu forto amé de flour blanco. Se n'en destrìo subretout que si sepalo soun lusènto e ounte se vèi de costo reticulado (fotò); la subsp. de Prouvènço ié dison approximata.

Usanço :
Li péu-de-lin soun pas acampa au nostre. Caupon un glucoside, la cuscutino, qu'ajudo à caga e à secreta la bilo. La cuscuto de Chino, Cuscuta sinensis, èi vertuouso contro li proublèmo de proustato e d'ourmono encò lis ome o li femo. Se chabis en gelulo dins lou coumèrci. Tant se poudrié que siegue parié pèr li nostre.

Port : Erbo
Taio : 10 à 30 cm
Fueio : ges
Tipe bioulougico : Teroufite
Cicle bioulougico : Planto de l'an

Gènre : Cuscuta
Famiho : Convolvulaceae

Ordre : Solanales

Coulour de la flour : Blanco
Petalo : 5
Ø (o loungour) enflourejado : 5 à 9 mm
Flourido : Printèms - Estiéu

Sòu : Ca
Autour basso e auto : 0 à 1200 m
Aparado : Noun
Mai à juliet

Liò : Tepiero seco - Relarg à jóuinis aubret
Estànci : Subremediterran à Mountagnard
Couroulougi : Paleoutemperado
Ref. sc. : Cuscuta approximata Bab., 1844

Martagoun

Lilium martagon

Liliaceae

Noms en français : Lis martagon, Racine d'Or.

Descripcioun :
Tras que poulido planto de nòsti mountagno que pòu flouri fin qu'à mai de 2500m d'auturo. Se recounèis evidentamen à si gròssi flour roujo picoutado e à si fueio verticilado pèr 5 e mai.

Usanço :
La cabosso èro manjado li tèms de carestié. A l'ouro d'aro soun li senglié que se n'en cargon alor que li cabróu esbrouton li fueio. Lou martagoun èi vertuous contro lou mau d'os, es un remoulissènt di car. Evidentamen lou fau pas acampa qu'es uno planto urousamen proutegido.